СҮРЭХТЭР КЭПСЭТЭР КЭМНЭРЭ

кулун тутар 26-27 күннэригэр Майа сэлиэнньэтигэр Дмитрий Ходулов аатынан Култуура киинигэр Аркадий Алексеев бирииһигэр „СҮРЭХТЭР КЭПСЭТЭР КЭМНЭРЭ“ VIII республикатааҕы ырыа күөн-күрэһин бастакы түһүмэҕэ түмүктэннэ. Улахан ырыа түһүлгэтигэр барыта 131 киһи Кэбээйи, Үөһээ Бүлүү, Бүлүү, Үөһээ Дьааҥы, Өлүөхүмэ, Уус-Майа, Орто Халыма, Ленскэй, Нам, Таатта, Амма, Чурапчы, Уус-Алдан, Хаҥалас улуустарыттан, Хатастан, Дьокуускай куораттан, ону таһынан Мэҥэ-Хаҥалас улууһуттан 15 нэһилиэк ырыаһыттара кыттыыны ыллылар. Барыта 70 биирдиилээн толорооччу, 17 бөлөх (дуэт, трио, квартет), дьүүллүүр сүбэ иннигэр иккилии ырыаны толордо. Быйылгы күрэх уратыта – бөлөҕүнэн толоруу солистартан туспа сыаналанар уонна 12 баянист ортотугар “Бастыҥ доҕуһуол” анал аат хаһаайына быһаарыллыаҕа. Дьүүллүүр сүбэҕэ үлэлээтилэр: <br>1. Дьүүллүүр сүбэ бэрэссэдээтэлэ Анна Исакова, сахалыы “Виктория” радио кылаабынай редактора; <br>2. Лина Акимова, “Туймаада” государственнай ырыа ансаамбылын солистката, СӨ үтүөлээх артыыската;<br>3. Георгий Белоусов, “Саха” көрдөрөр-иһитиннэрэр хампаанньа ыытааччыта, СӨ телевидениетын туйгуна. <br>4. Петр Кулаковскай, эстрада ырыаһыта, СӨ ыччат политикатын туйгуна.<br>5. Василий Захаров – Майатааҕы Марина Попова аатынан оҕо искусствотын оскуолатын салайааччыта, СӨ култууратын үтүөлээх үлэһитэ.