Каникуллары туһалаахтык...

Майатааҕы Дмитрий Ходулов аатынан Норуот айымньытын дьиэтигэр күһүҥҥү каникуллар бириэмэлэригэр, улууспут оскуолаларын оҕолоругар анаан экскурсияҕа ыҥырыы тарҕатыллан Бырама, Суола Моорук, Тиэлиги уонна Павловскай нэһилиэктэриттэн уопсайа 31 оҕо уонна 5 салайааччы кэлэн ыалдьыттаан бардылар. Оҕолор Култуура киинин устун хаама сылдьан уус-уран коллективтар, үлэһиттэр туһунан Эдэр көрөөччү театрын режиссера Александра Скрябина кэпсиириттэн быйыл төрөөбүтэ 110 сылын бэлиэтиир ытык киһибит, ССРС народнай артыыһа Дмитрий Федорович Ходулов айымньылаах үлэтин туһунан уонна Россия үрдүнэн үлэлиир "Пушкинскай карта" программатын туһунан иһиттилэр, биллилэр-көрдүлэр. Кэпсээни улахан экраҥҥа көрдөрүллүбүт видеоролик ыпсарда. Ону тэҥэ, каникуллар кэмнэригэр "Манчаары" киинэ саалатыгар аатырбыт “Тыгын Дархан” киинэни көрдөрүү тэриллибитэ. Бу киинэҕэ Пушкинскай каартанан билиэт ылыахха сөп этэ. Оҕолор артыыс гриимнэнэр хосторун, сценография, бутафория оҥоһуллар малларын-салларын көрөн, тутан-хабан, сэҥээрэн бардылар. Каникултан да ураты күннэргэ оскуола оҕолорун экскурсияҕа, киинэҕэ ыҥырабыт. Эрдэттэн сөбүлэҥ ылар көдьүүстээх буолуоҕа.

14 ноября 2022 г. 10:03