«Туой-Хайа-Фест 2025» өрөспүүбүлүкэтээҕи ХХХII бэстибээл-куонкуруһун түмүгүнэн Линда Захарова 2 истиэпэннээх дипломант буолла, КӨРӨӨЧЧҮЛЭР БИҺИРЭБИЛЛЭРЭ анал ааты ылла уонна «Туой-Хайа-Фест 2025» иһинэн ыытыллыбыт «БАТТЛ ГОДА» шоу-программа кыайыылааҕа!

«Туой-Хайа-Фест 2025» эстрада ырыатын толорооччулар уонна ВИА кэлэктииптэрин өрөспүүбүлүкэтээҕи ХХХII бэстибээл-куонкуруһа от ыйын 10-13 күннэригэр буолан ааста. Тэрийээччи – АЛРОСА култуураҕа-успуорка комплекса. Быйыл куонкурус үс сүүмэрдиир түһүмэҕэ, үгэс курдук, Мииринэй улууһун Арыылаах бөһүөлэгэр уонна Мииринэй куоракка буолулар. Бириис уопсай пуондата – 965 000 солкуобай. Куонкурус сүрүн учредителэ – «АЛРОСА» акционернай хампаанньа.<br>Бэстибээл-куонкуруска биирдиилээн толорооччулары, дуэттары, триолары, ВИА-лары, сахалыы эстрада ырыатын кэлэктиибинэн толорооччулары, ол иһигэр ааспыт сыллардааҕы күрэстэр кыайыылаахтарын уонна лауреаттарын, ыҥырбыттара. Кыттааччылар саастара – 16 – 40 саас. Сүрүн ирдэбил – ырыа «тыыннаахтыы» толоруллуохтаах («плюс» фонограмма көҥүллэммэт), оттон ВИА-лар – толору (доҕуһуола, ырыата) «тыыннаахтыы». «Туой Хайа» бэстибээл-куонкурус – бэйэ кыаҕын-дьоҕурун көрдөрөргө, талааннаах толорооччулардыын билсэргэ, саҥа айар бырайыактары толкуйдуурга, маастар-кылаастарга профессионаллардыын алтыһарга кыаҕы арыйар үтүө түһүлгэ. Бу куонкурустан кынат анньынан Павел Семенов-Байбал, Лэгэнтэй, Ника, Сиэйэ Уола, Виталий Очиров, Дарья Лаврова, Ангелина уонна Ирена Файрушиналар, о.д.а. курдук биллэр ырыаһыттар ситэн-сириэдийэн тахсыбыттара.<br>Мэҥэ Хаҥалас улууһуттан Д.Ходулов аатынан норуот айымньытын дьиэтин уус-уран салайааччыта Линда Захарова кыттыыны ылла. Кини үс түһүмэҕи ааһан Гала-кэнсиэргэ кытынна. Гала-кэнсиэр уонна 2-с сүүмэрдиир түһүмэх «Алмазный край» телекомпания ВКонтакте-сирэйигэр быһа эпииргэ көрдөрүллүбүтэ.<br>Линда 2-с түһүмэххэ кыттыытын биһиги ХОДУЛОВ-KIIN рутууб-ханаалбытыгар киирэн көрүҥ, сэргээҥ. Кини ити түһүмэххэ 2 ырыаны толордо: Уйбаан Уххан тылларыгар Ольга Охлопкова-Чөмчүүнэ дьүрүлүгэр «Хатыҥнар» уонна Эрхаан тылыгар уонна дьүрүлүгэр «Чолбон» ырыалары.<br>«Туой-Хайа-Фест 2025» эстрада ырыатын толорооччулар уонна ВИА кэлэктииптэрин өрөспүүбүлүкэтээҕи ХХХII бэстибээл-куонкуруһун түмүгүнэн Линда Захарова 2 истиэпэннээх дипломант буолла, ону тэҥэ КӨРӨӨЧЧҮЛЭР БИҺИРЭБИЛЛЭРЭ анал ааты биир дойдулаахтарын, киниэхэ сүгүрүйээччилэрин куоластарын көмөтүнэн ылла. Бары куоластаабыт дьоммутугар барҕа махталбытын биллэрэбит!<br>Маны таһынан Линда «Туой-Хайа-Фест 2025» иһинэн ыытыллыбыт «БАТТЛ ГОДА» шоу-программаҕа кыайыылааҕынан тахсыбыта. <br>Линданы ситиһиилэринэн итиитик-истиҥник эҕэрдэлиибит!<br>Айар талааныҥ арыллан истин!