«Манньыаттаах» тур презентациятыгар Д.Ф.Ходулов аатынан норуодунай тыйаатыр артыыһа Олег Петров Манньыаттаах уолун уобараһын итэҕэтиилээхтик толордо
19 сентября 2025 г. 16:42
Бүгүн, балаҕан ыйын 19 күнүгэр – Саха Өрөспүүбүлүкэтигэр урбаанньыт күнүн көрсө Мэҥэ Хаҥалас улууһун I Тыыллыма нэһилиэгин Аһыкай аҕа ууһун алааһыгар «Манньыаттаах» туристическай маршрут презентацията ыытылынна. Бу тур блогер, фермер, урбаанньыт Михаил Масаха тус көҕүлээһининэн, Мэҥэ Хаҥалас улууһун Бизнес-инкубатора өйөбүлүнэн тэриллэн 2 ый устата үлэлээтэ. Хас өрөбүллэр ахсын баҕалаах дьон Саха историятыгар биллэр, аатырбыт-сураҕырбыт 1 гильдиялаах атыыһыт, меценат Гаврил Васильевич Никифоров-Манньыаттаах уола олоҕун билсэн, олорбут өтөҕүн көрөн, сэргээн аастылар. Санатан этэр эбит буоллахха, бу үлэ XIX үйэ 70-с сылларыгар тутуллубут дьиэни реставрациялыыр сыаллаах-соруктаах ыытыллар, анал фондаҕа үп хомуллар.<br>Бу тэрээһиҥҥэ Д.Ф.Ходулов аатынан норуот айымньытын дьиэтэ үлэлээтэ уонна Д.Ф.Ходулов аатынан норуодунай тыйаатыр артыыһа Олег Петров Василий Егорович Васильев-Харысхал «Эргиллиэм хайаан да... » айымньытыттан монолог ааҕан ыалдьыттар сэҥээриилэрин ылла, Манньыаттаах уолун уобараһын итэҕэтиилээхтик толордо.
