Майатааҕы народнай Эдэр көрөөччү театра 27-с театральнай сезонун ахсынньы 9 күнүгэр - Дьоруойдар күнүгэр арыйда

Ахсынньы 9 күнүгэр, Арассыыйаҕа Дьоруой күнүгэр, Улуу Кыайыы 80 сылын түмүктүү, сахалартан бастакы Сэбиэскэй Сойуус Дьоруойа Федор Поповка аналлаах, Майатааҕы норуодунай эдэр көрөөччү тыйаатырын уонна И.Г. Тимофеев аатынан Майа лиссиэйин «Бастыҥнар хамсааһыннарын» уонна «Оскуола тыйаатыра» федеральнай бырайыак иһинэн үлэлиир «Алыптаах мааска» куруһуок эдэр артыыстара Д.Ф. Ходулов аатынан норуот айымньытын дьиэтигэр испэктээктэри көрдөрдүлэр.<br> Оҕолор көрөөччүлэригэр бастакынан А.П. Чехов «Хамелеон» кэпсээнинэн испэктээк туруордулар. Эдэр артыыстар олус итэҕэтиилээхтик, уобарастарыгар киирэн, күлүүлээх, үөрэтэр кэпсээни ис хоһоонун чаҕылхайдык арыйдылар. Ол кэннэ Тимофей Сметанин «Егор Чээрин» сэһэнигэр олоҕурбут инсценировканы көрдөрдүлэр.<br>Уонна түмүккэ Федор Кузьмич Попов үтүө аатын, кылгас да буоллар, чаҕылхай олоҕун, кистэлэҥ тапталын, доҕотторун кытта сыһыанын, оҥорбут хорсун быһыыларын көрдөрөр олус долгутуулаах «Тыыннаах сулус» испэктээги туруордулар. Бу улахан үлэҕэ бэлэмнэнии эрдэттэн саҕаламмыта. Оҕолор кини туһунан айымньылары үөрэппиттэрэ, Баатара нэһилиэгэр түмэлгэ сылдьыбыттара, ырыаҕа-хоһооҥҥо киирбит уобараһын ырыппыттара ис хоһоону өйдүүргэ улахан көмөлөөх буолбут. <br>Кэлбит оҕолорго, көрөөччүлэргэ хорсун быһыыга ытыктабыллаах сыһыан, үтүө санааланыы, эйэҕэс киһилии киһи сүрүн өйдөбүллэрэ Аҕа дойду Дьоруойдарын, үтүө уонна хорсун санааларын туһунан билиһиннэрэр сыал-сорук силигин ситтэ диэххэ сөп. Бары кыттыбыт оҕолор саҥаны билэн, сэрии амырыын өйдөбүллээҕин болҕомтоҕо ыллылар.<br>Арассыыйа Кыайыы көтөллөөх дойду. Хайдахтаах да ыарахан түгэҥҥэ биһиги дойдубут түмүккэ кыайыылаах буолар. Бу барыта норуоппут дойдутугар бэриниилээх буолуута, таптала күүстээҕин туоһута. Биир дойдулаахтарыгар күүстээх санаалаах хорсун дьон — Дьоруойдар ааттара умнуллубат! Үйэлэргэ ааттана туруоҕа!