Арассыыйаҕа аан бастакытын бэлиэтэммит Артыыс күнүгэр Майа оскуолаларыгар «Манньыаттаах уола» испиктээх артыыстарын кытта көрсүһүүлэр буоллулар

Тохсунньу 17 күнэ - Араассыыйаҕа Артыыс күнүнэн биллэриллибитэ. Бу күн - ССРС бастакы народнай артыыһа, Москватааҕы художественнай тыйаатыр төрүүттээччилэриттэн биирдэстэрэ, уһулуччулаах педагог, актерскай сатабыл систематын ааптара Константин Сергеевич Станиславскай төрөөбүт күнэ буолар. <br>Бу күн Майатааҕы Д.Ходулов аатынан норуот айымньытын дьиэтин көҕүлээһининэн Майа сэлиэнньэтин 3 оскуолаларыгар Майатааҕы народнай Эдэр көрөөччү тыйаатыра, киинэ артыыһа Александра Скрябинаны, Д.Ходулов аатынан народнай тыйаатыр режиссера, киинэ артыыһа Данил Осиповы, киинэ, тыйаатыр артыыһа, «Манньыаттаах Уола» испиктээккэ сүрүн оруолу толорбут Ньургун Бэчигэни, Мэҥэ Хаҥалас улууһун култуураҕа уонна духуобунай сайдыыга салалтатын тэрийэр отделын специалиһа, киинэ артыыһа Спиридон Григорьевы, киинэ, тыйаатыр артыыһа, продюсер Алгыс Макаровы кытта көрсүһүүлэр тэрилиннилэр. <br>Ыалдьыттар оҕолорго хайдах артыыс буолбуттарын, артыыс идэтэ чэпчэкитэ суоҕун, ханнык үөрэхтэр баалларын, тус бэйэлэрин үлэлэрин-хамнастарын билиһиннэрдилэр, ыйытыктарга хоруйдаатылар.<br>Ол кэннэ Д.Ходулов аатынан норуот айымньытын дьиэтигэр кэлбит практикааннар - А.Д.Макарова аатынан култуура уонна искусство коллеждын устудьуоннара оҕолорго кылгас трениннэри ыыттылар.