Мэҥэ Хаҥаласка Култуура сылын арыллыытыгар социокультурнай бырайыактары көмүскээһиҥҥэ Александра Скрябина бырайыага 5 кыайыылаах ортотугар ааттанна!

Тохсунньу 28 күнүгэр, В.В. Местников аатынан Култуура сайдыытын киинигэр «Мэҥэ Хаҥалас киэн туттуута – кыайыыга кынаттыыр култуурата!» култуура сылын арыйар үөрүүлээх тэрээһин ыытылынна. <br><br>Бу күн 2026 сылга тэриллэр уопсастыбаннай суолталаах тэрээһиннэри ыытыыга улуус бары култуура тэрилтэлэрин икки ардыларыгар тус үбүлээһини ылыыга анаммыт социокультурнай бырайыактары көмүскээһинтэн саҕаланна. <br><br>Үөрүүлээх чааһы биэс көлүөнэ ыытааччылар Анна Охлопкова уонна Павел Егоров, Галина Эверстова уонна Дмитрий Санников, Надежда Максимова уонна Спиридон Григорьев, Мария уонна Станислав Ивановтар, Алия Дмитриева уонна Алгыс Попов иилээн-саҕалаан ыыттылар. <br>Бэлиэ күнү кырыымпаһыттар, «Кыталык», «Ай-тыын», «Манчаары» үҥкүү бөлөхтөрө, фитнес, «Рябинушки», «Аарык», «Кэрэли» ырыа ансаамбыллара, «Суола кыргыттара» дуэт, «Гармония» аккордеон ансаамбыла, Павел Егоров, Сардаана Осипова, Прокопий Федоров, Сахая Макарова, Давид Трофимов, Надя Сметанина ылбаҕай ырыаларынан киэргэттилэр. Кэнсиэр «Кынаттаах култуурабыт» ырыанан түмүктэннэ. <br><br>Мустубут дьоҥҥо, көрөөччүлэргэ СӨ култуураҕа уонна духуобунай сайдыыга миниистирэ Афанасий Ноев, Ил Түмэҥҥэ норуот дьокутаата Андрей Находкин, оройуон дьокутааттарын Сэбиэтин бэрэссэдээтэлэ Иннокентий Андросов, улууспут култуураҕа уонна духуобунай сайдыыга салалтатын салайааччыта Анна Исакова эҕэрдэ тылларын анаатылар. <br><br>Бырайыактары көмүскээһин түмүгүнэн 5 бырайыак кыайыылааҕынан ааттанна. Олор истэригэр Д.Ходулов аатынан норуот айымньытын дьиэтин иһинэн үлэлиир Майатааҕы народнай эдэр көрөөччү театрын режиссера, СӨ култууратын туйгуна Александра Скрябина «Ты такой же как и я» бырайыага кыайыылааҕынан ааттанна уонна бу барыйыагы олоххо киллэриигэ ананар 70 тыыһ. ыларын туоһулуур сэртипикээти тутта.<br><br>Александра Семеновнаны эҕэрдэлиибит! Айымньылаах үлэни!