Бэс ыйын 20 күнүгэр Майаҕа Ураһалаах алааска улуустааҕы ыһыах киэҥ хабааннаахтык ыытылынна

Бэс ыйын 20 күнүгэр Майаҕа Ураһалаах алааска улуустааҕы ыһыах киэҥ хабааннаахтык ыытылынна. Ыһыах үөрүүлээх арыллыытын кылаабынай режиссерунан үлэлээтэ Д.Ходулов аатынан народнай театр режиссера – СӨ култууратын туйгуна Данил Осипов. Сценарийы суруйда СӨ култууратын туйгуна Елена Варламова.Театрализованнай көрдөрүүгэ көхтөөхтүк кыттыбыт Д.Ходулов аатынан народнай театр артыыстарыгар, сүүмэрдэнэн кэлбит улууспут култууратын үлэһиттэригэр, нэһилиэктэртэн анаан-минээн маасовкаҕа кыттыбыт бар дьоммутугар, Майа тэрилтэлэрин үлэһиттэригэр, үҥкүүһүттэргэ, холбоһуктаах хуор ырыаһыттарыгар, атын да түгэннэргэ үлэлэспит Майабыт дьонугар-сэргэтигэр барҕа махталбытын тиэрдэбит.<br>Ону тэҥэ, чуолаан махтанабыт ыһыах сиэригэр-туомугар уонна күн көрсүүтүгэр көхтөөхтүк кыттыбыт киин библиотека, «Кэнчээри» уһуйаан кэлэктииптэригэр, «Харыстаана» түмсүү, «Айыына» ансаамбыл кыттыылаахтарыгар, райпо бэтэрээннэрин түмсүүтүгэр.<br>Маны тэҥэ, киин түһүлгэҕэ үөрүүлээх чааһа, театрализованнай көрдөрүүтэ бүппүтүн кэннэ, Майа түһүлгэтигэр Майа тэрилтэлэрэ, түөлбэлэрэ, көхтөөх дьоно кыттыылаах Майа ыһыаҕа тэрилиннэ. Манна үөрүүлээх чааһын ырыанан-тойугунан, үҥкүүнэн киэргэттилэр «Дьиэрэй» народнай төрүт дорҕоон бөлөҕө, «Кыталык» үҥкүү народнай ансаамбыла, «Талба» киин балыыһа хомусчуттарын бөлөҕө, Алена Ефимова, Еремей Захаров. Үөрүүлээх чаас оһуохайынан түмүктэннэ. Оһуохайы таһаардылар СӨ култууратын туйгуна Валентина Кривошапкина уонна Майа көхтөөх ыччата Сергей Марков.<br>Күндү айар талааннаах дьоммутугар сайыҥҥы кэрэ кэми туһалаахтык атаараргытыгар, күүс-сэниэ ылан өссө да айар-тутар дьоҕургут кэҥииригэр баҕарабыт.