«Биһиги нэһилиэстибэбит» күөн-күрэс улуустааҕы түһүмэҕэр биһиги кэлэктииптэрбит ситиһиилэрэ

«Биһиги нэһилиэстибэбит» диэн күөн-күрэс улуустааҕы түһүмэҕэ бэс ыйын 20 күнүгэр Ураһалаахха, улуустааҕы ыһыах иитинэн, фольклор түһүлгэтигэр «Самаан сайыны уруйдуу» диэн фольклор, хореография, вокал көрүҥнэригэр эҕэрдэ кэнсиэр чэрчитинэн ыытылынна. Бу көрүүгэ кыайбыт кэлэктииптэр аны күһүн улуус чиэһин иккис түһүмэххэ көмүскүүллэр. Ол курдук, Д.Ходулов аатынан норуот айымньытын дьиэтин аатыттан 3 кэлэктиип кыттыыны ылла: фольклорга «Дьиэрэй» народнай төрүт дорҕоон бөлөҕө (сал. Мария Иванова, Ульяна Ефремова), вокалга «Айыына» вокальнай ансаамбыл (сал. Светлана Борисова, Саргылана Ефимова) уонна «Аарык» квартет (сал. Георгий Сергучев). Дьүүллүүр сүбэ быһаарыытынан фольклорга «Дьиэрэй» народнай төрүт дорҕоон бөлөҕө таҕыста, онтон вокалга кыайыылааҕынан «Айыына» вокальнай ансаамбыл ааттанна. «Аарык» квартет иккис миэстэни ылла. <br>Кыайыылаах кэлэктииптэрбитин истиҥник эҕэрдэлиибит!