Günaydın (Үтүө күнүнэн) Майа! Teşekkürler (Махтал) Стамбул!

Günaydın (Үтүө күнүнэн) Майа! Teşekkürler (Махтал) Стамбул!<br>Сайын саамай итии кэмигэр - от ыйын 13-19 күннэригэр Турцияҕа Стамбул куоракка Аан дойду норуот үҥкүүтүн күрэҕэр (World Folk Dance Competition) Майаттан “Кыталыына” үҥкүү бөлөҕө (сал. Т. Стручкова), “Дьиэрэй” норуодунай фольклорнай ансаамбыл (сал. М. Иванова), “Аарык” эр дьон вокальнай квартета (сал. Г. Сергучев), “Кыталыыналар” “ытарҕа эдэр кыргыттара” уонна Илгэлээх Испирдиэн (С. Григорьев) биир бөлөх буолан кыттыыны ыллылар. Күрэх тэрийээччинэн буолаллар Турция норуот үҥкүүтүн федерацията, тэрээһин олус улахан: Европаттан, Азияттан, Африкаттан, Соҕуруу уонна Хоту Америкаттан - 37 дойдуттан 45-чэ бөлөх, онно икки тыһыынчаттан тахса үҥкүүһүт кытынна. Күрэх кыттааччылара барыта Стамбул биир улахан Техническэй университетын кампуһугар доҕордоохтук олордулар. Күн аайы тэрээһин, күрэх бырагырааммата киэҥ. Маҥнайгы тэрээһин Бешикташ стадионуттан саҕалаан киин болуоссакка дылы норуоттар сэлэлээн хамыылара буолла. Кыттааччы үҥкүү бөлөхтөрө куорат араас концертнай былаһаккаларыгар, Турция атын куораттарыгар баран кэнсиэрдээтилэр. Күрэх бырагырааматын таһынан, кыттааччыларга - Босфорунан яхтанан айан, уонна Стамбул историялаах сирдэринэн экскурсия тэриллибитэ.<br>Күрэх сүрүнэ 17-18 күннэргэ ыытылынна, Стамбул куорат биир саастаах “Газхане” түмэл аһаҕас сыанатыгар кыттааччылар бэйэлэрин дойдуларын норуотун үҥкүүлэрин уонна култуураларын баайын көрдөрдүлэр. Күрэх биир сценаҕа аан дойду биэс континенын кыттааччыларын холбоото.<br>Дьүүллүүр сүбэ састаабыгар аан дойду араас регионнарыттан — Европаттан, Азияттан, Африкаттан уонна Латыын Америкаттан — хореография эйгэтигэр билиниллибит экспердэр киирбиттэрэ. Кыттааччылар икки категорияҕа күрэхтэстилэр: «Аутентичнай», «Стилизованнай» хайысхаларга. Дьүүллүүр сүбэ техниканы уонна хореография уустугун эрэ буолбакка, таҥастарын, муусукаларын уонна кыттааччылар туспа ураты быһыылаах истииллэрин сыаналаатылар.<br>Түммүккэ «Аутентичнай» хайысхаҕа - “Айтуган” үҥкүү норуодунай ансаабыла (Уфа куорат Технология уонна наука универтистета, Башкортостан), «Стилизованный» хайысхаҕа - “Тракия” профессиональнай ырыа уонна үҥкүү фольклорнай ансаамбыла (Болгария) кыайыыны ситистилэр.<br>Биһиги бөлөхпүт, саха таптыыр кэтэһэр бырааһынньыгын “Ыһыах” үгэһин толоруу үҥкүүнэн дьүһүйүүнү көрдөрдүбүт, кыттыылаах араас омук, тэрийээччилэр биһирэбиллэрин ыллыбыт. Аан дойду норуот үҥкүүтүн күрэҕэр кыттыыны ылан араас омуктары кытта алтыспыппытыттан уонна бэйэбит үгэспитин култуурабыт баайын киэҥ дойдуга таһаарбыппыттыттан, арыйбыппытыттан киэҥ туттабыт. Биир “дьиэ кэргэн” буолан сылдьыбыт “Кыталыына”, “Дьиэрэй”, “Аарык” бөлөхтөргө, эдэр оҕолорбутугар уонна Илгэлээх Испирдиэнҥэ - көхтөөх, айымньылаах, талааннаах кыттааччыларыгар махталбытын этэбит, Майаттан Стамбул куоракка дылы тэрийэн ыыппыт “Кыталык” оҕо, ыччат эстетичэскэй кииҥҥэ (дир. С. Терентьева), Д. Ф. Ходулов аатынан норуот айымньытын дьиэтигэр (дир. Е. Ефремова) тeşekkür ederim!